Posts
माओवादीले राष्ट्रिय स्वाधीनताको आन्दोलन भन्दै टाँसेको पोस्टरमा भारतको
अशोक स्तम्भ र झण्डा भएको बुटले नेपालका सीमा मिचिएका क्षेत्रमा कुल्चँदै
गरेको यही पोस्टर देखेर भारतीय रिसाए। उनीहरुले
जोगबनी नाकामा माओवादी र प्रचण्डविरोधी नारा लगाउँदै अनिश्चित कालका लागि
नाका बन्द गरेका छन्।
सीमामा अतिक्रमण र राजनीतिमा हस्तक्षेप गरेको भन्दै भारतविरुद्ध आन्दोलन गरिरहेको माओवादीविरुद्ध दसगजामा प्रदर्शन भएको छ । विराटनगरको सीमावर्ती जोगबनीमा मंगलबार भएको प्रदर्शनमा माओवादी अध्यक्ष प्रचण्डको पुत्लासमेत जलाइएको छ ।
रामविलास
पासवानको नेतृत्वमा रहेको बिहारको क्षेत्रीय लोकजनशक्ति पार्टीका महासविच
जाकिर हुसेन खानको नेतृत्वमा जोगबनीको दसगजा क्षेत्रमा नेपाली
माओवादीविरुद्ध नाराबाजी भएको थियो ।
राष्ट्रिय स्वाधीनताको नारा लिएर नेपालमा आन्दोलन गरिरहेको माओवादीले
सार्वजनिक गरेको पोस्टरमा जुत्तामा अशोक चिह्न र भारतको राष्ट्रिय झन्डा
चित्रित गरिएको भन्दै प्रदर्शन भएको हो ।
नेपालका
सीमा क्षेत्रमा भारत बुझाउने (झन्डा र अशोकचिह्न अंकित) बुटले कुल्चिएको र
रगत झरिरहेको चित्र माओवादीले सीमा क्षेत्रमा सार्वजनिक गरेको छ । बुटमा झन्डा र चिह्न प्रयोग गरेर भारतको अपमान गरेको भन्दै सीमा क्षेत्रमा प्रदर्शन भएको हो ।
विराटनगर भन्सारको दसगजा क्षेत्रमा नाराजुलुस गर्दै भारतीयले मंगलबार आवागमनसमेत ठप्प पारेका हुन् । उनीहरूले माओवादीका क्रियाकलाप भारतविरोधी भएको भन्दै तत्काल प्रचण्डले भारतीय नागरिकसँग माफी नमागे संघर्ष गर्ने बताएका छन् ।
उनीहरूले भारतविरोधी गतिविधि गर्नेलाई कारबाही नगरेको भन्दै मोरङका प्रमुख जिल्ला अधिकारीलाई स्मरणपत्रसमेत बुझाएका छन् ।
'नेपाल की कम्युनिस्ट पार्टी (माओवादी) द्वारा किया भारतविरुद्ध आचरण से
हम भारतवासी आहत हैं,' प्रजिअलाई बुझाइएको स्मरणपत्रमा भनिएको छ, 'विदित
है कि भारतमाता के राष्ट्रिय प्रतीक अशोक चिह्न एवं राष्ट्रिय झन्डा का
जुते में अंकित कर पोस्टरों के द्वारा खुलेआम नेपाली भूभाग में प्रचारित
किया गया है । नेपाल प्रशासनद्वारा ऐसे कुकृत्यों का अबतक विरोध या विरोध में कोई कारबाही नहीं किया ।'
मोरङका प्रमुख जिल्ला अधिकारी शशिशेखर श्रेष्ठले भने स्थानीय स्तरबाट यस समस्याको समाधान गर्न नसकिने बताए । 'हामीले केन्द्रलाई जानकारी दिने हो, यसमा स्थानीय स्तरबाट केही गर्न सकिँदैन,' श्रेष्ठले भने ।
प्रदर्शनकारीले मंगलबार सांकेतिक विरोध मात्र भएको भन्दै भारतविरोधी गतिविधि रोक्न तीनसूत्रीय मागसमेत राखेका छन् ।
जसमा भारतविरोधी गतिविधि बन्द गराउनुपर्ने, माओवादी अध्यक्ष प्रचण्डले
भारतीय जनतासँग माफी मागेर यस्ता गतिविधि बन्द गर्ने घोषणा गर्नुपर्ने र
भारत-नेपाल मैत्रीविरोधी तत्त्वलाई कारबाही गर्नुपर्ने माग राखेका छन् ।
'यो हाम्रो सांकेतिक विरोध मात्र हो, नेपाल सरकारले यसलाई बेवास्ता गरे
पूरै नाकाबन्दी गरेर आन्दोलित हुनेछौँ,' बिहारका पूर्वसभासद् खानले भने ।
आन्दोलनमा
रहेको माओवादीले राष्ट्रिय जागरण तथा भन्डाफोर अभियानअन्तर्गत सीमा
क्षेत्रमा भारतीय हस्तक्षेपको विरोधमा विभिन्न पर्चा, पमप्लेट टाँसिरहेको छ ।
यसैको विरोधमा उत्रिएको भारतीय समूहले 'भारतविरोधी गतिविधि बन्द गर्,
प्रचण्ड मुर्दावाद' लेखिएका प्लेकार्डसहित दसगजा क्षेत्रमा नाराजुलुस
गरेको हो ।
बिहान साढे १० बजेदेखि सुरु भएको प्रदर्शनले मंगलबार विराटनगर भन्सारको कारोबार पनि ठप्प भएको छ । भन्सार कार्यालयका अनुसार नाका अवरुद्ध हुँदा दैनिक संकलन हुने करिब दुई करोड ५० लाख राजस्व असुलीसमेत प्रभावित भएको छ । भन्सार-प्रमुख मित्रलाल रेग्मीले भारतीय नागरिकको अवरोधका कारण जाँचपास हुन नसकेको बताए ।
विरोध प्रदर्शनका कारण जोगबनी बजारमा प्रवेश गर्ने नेपालीलाई समस्या परेको थियो भने सबै सवारीसाधनको आवत-जावतसमेत प्रभावित भएको थियो ।
यता
माओवादीका मोरङ अध्यक्ष शिवकुमार मण्डलले सीमा अतिक्रमणविरुद्ध झन्डाफोर
अभियान जारी रहेकाले भारतमा माओवादी र प्रचण्डको विरोध हुनु कुनै अनौठो
नभएको बताए । 'उनीहरूको यस्तो विरोधले हामीलाई हतोत्साही गर्दैन, बरु झन् जागरुक गराउँछ,' उनले भने ।
पूर्व
क्षेत्रका प्रहरी नायब महानिरीक्षक भीष्म प्रसाईंले भारतीय नागरिकले गरेको
विरोधका विषयमा प्रहरी आफैँले कूटनीतिक पहल गर्न नसक्ने बताए । 'हाम्रो जिम्मेवारीअनुसार यसको जानकारी केन्द्रमा पठाएका छौँ,' प्रसाईंले भने ।
यसअघि सीमा मिचिएका स्थानमा माओवादीले गाडेको पार्टीको झन्डा उखेलेर फालिएको थियो । अतिक्रमित भूमिमा झन्डा गाड्ने माओवादीका १० जना नेता/कार्यकर्तालाई भारतीय सुरक्षाकर्मीले उग्रवादीको सूचीमा राखेको छ ।
मोरङको सीमावर्ती डाइनिया गाविसमा पार्टीको झन्डा गाडेकाले पार्टीका १०
जनालाई भारतीय सुरक्षाकर्मीले उग्रवादीको सूचीमा राखेर खोजी गरिरहेको
घटनाप्रति माओवादी मोरङले कडा आपत्ति जनाएको छ ।
राष्ट्रिय
जागरण तथा भन्डाफोर अभियानअन्तर्गत माओवादीले डाइनियामा अतिक्रमित भूमिमा
पार्टीको झन्डा गाडेपछि एसएसबीले स्थानीय सर्वसाधारणलाई धम्क्याउने,
तर्साउने र डर देखाउने गरेको एमाओवादीका मोरङ इन्चार्ज मण्डलले बताए ।
माओवादीका
मोरङ सह-सेक्रेटरी बलिदान, क्षेत्र नम्बर १ का इन्चार्ज कालु, वाइसिएलका
क्षेत्रीय अध्यक्ष विनय, उपाध्यक्ष ललित पण्डित, क्षेत्रीय सदस्य अजिम
मियाँ, मैनुदिन मियाँ, पार्टीका डाइनिया गाउँ सेक्रेटरी जयप्रकाश, सदस्य
तजिर मियाँ, मनीष मण्डल र इम्तिहासको खोजी एसएसबीले गरिरहेको पार्टीद्वारा
जारी विज्ञप्तिमा जनाइएको छ ।
डाइनिया वडा नम्बर १ र २ को सिक्टी क्षेत्रमा २१ बिघाभन्दा बढी ऐलानी जग्गा भारतीय नागरिक बाजुद्दिन, कपिलुद्दिन र समीर उद्दिनले अतिक्रमण गरेको माओवादीको दाबी छ ।
